یوکرین کے صدر کا کورونا وائرس ویکسین تیار کرنے والے سائنسدانوں کیلئے 1 ملین ڈالر انعام کا اعلان

یوکرین کے صدر نے کورونا وائرس ویکسین تیار کرنے والے سائنسدانوں کیلئے 1 ملین ڈالر انعام کا اعلان کیا ہے۔ یوکرین میں اب تک 93 ہلاکتیں اور 3102 کیسز سامنے آ چکے ہیں۔ فرانسیسی خبررساں ادارے کے مطابق یوکرین صدر کی ترجمان نے کہا ہے کہ یہ صدر کا خیال ہے کہ یہ ایک پرکشش انعام ہے، وہ چاہتے ہیں کہ جلد از جلد ویکسین تیار ہو تاکہ ہزاروں زندگیوں کو بچایا جا سکے۔
انہوں نے کہا کہ صدر چاہتے ہیں کہ سائنسدان مزید سرگرم ہو کر ویکسین کی تیاری کو یقینی بنائیں تاکہ پوری دنیا کی مدد کی جا سکے۔ عالمی ادارہ صحت نے بھی کورونا کی ویکسین کی تیاری کی اہمیت کو اجاگر کرتے ہوئے کہا ہے کہ وائرس کی ایک سے دوسرے شخص تک منتقلی کو روکنے کیلئے ضروری ہے کہ جتنی جلدی ممکن ہو سکے اس کی ویکسین تیار کی جائے۔ کورونا وائرس کے باعث اب تک دنیا بھر میں ایک لاکھ سے زائد ہلاکتیں اور متاثرین کی تعداد 18 لاکھ سے تجاوز کر گئی ہے۔