امارات میں کورونا مریضوں کے نام اورتفصیلات ظاہر کرنے والوں کو سزا اور جرمانہ ہو گا

 امارات میں پولیس کی جانب سے لوگوں کو خبردار کیا گیا ہے کہ وہ کورونا کے تصدیق شدہ یا مشتبہ مریضوں کے نام اور دیگر تفصیلات سوشل میڈیا پر ظاہر کرنے سے باز رہیں، ورنہ انہیں قید اور جرمانے کی سزا کا سامنا کرنا ہو گا۔عجمان پولیس کے مطابق کئی سوشل میڈیا صارفین اپنے جاننے والوں یا ہمسایوں کو سوشل میڈیا پر کورونا کا مریض ظاہر کر رہے ہیں یا پھر ان کے کورونا کے تصدیق شدہ مریضوں سے رابطے میں رہنے کے دعویٰ کر رہے ہیں۔

ان لوگوں کو اپنے غیر ذمہ دارانہ رویئے سے باز رہنا چاہیے۔ جو لوگ کورونا کے تصدیق شدہ یا مشتبہ مریضوں اور ان کے گھر والوں کی شناخت ظاہر کر رہے ہیں اور تصاویر پوسٹ کر رہے ہیں، ان کا یہ عمل لوگوں کی پرائیویسی کو متاثر کرنے اور انہیں 

جو صارفین کورونا کے مشتبہ یا تصدیق شدہ مریضوں کے لیے اپنی جانب سے ادویہ یا علاج تجویز کر رہے ہیں یا ان کی شناخت ظاہر کر کے ان کے حق میں دعائیں اپنی جانب سے نیک عمل کر رہے ہیں، انہیں بھی جیل کی ہوا کھانی پڑ سکتی ہے۔ پولیس کے مطابق سینکڑوں افراد کی جانب سے شکایات درج کرائی گئی ہیں کہ کچھ سوشل میڈیا صارفین ان کی کورونا کے حوالے سے تشہیر کر کے ان کی بدنامی کر رہے ہیں۔

پولیس کی جانب سے ان تمام شکایتوں پر تفتیش شروع کر دی گئی ہے، ذمہ داروں کو قانونی کارروائی سے گزرنا ہو گا۔لوگوں کو نجی زندگی سے متعلق پوسٹ کرنے، اس پر کمنٹس اور انہیں شیئر کرنے سے بھی باز رہنا ہو گا۔ کورونا کے کسی مریض کی ہسپتال، سڑک یا کسی اور مقام پر لی گئی تصویر کو شیئر کرنے پر بھی پولیس کارروائی کرے گی۔ گزشتہ ایک ماہ کے دوران ان تمام خلاف قانون حرکات کرنے والوں کو سزائیں دی جا چکی ہیں۔

واضح رہے کہ متحدہ عرب امارات میں کرفیو یا سیکیورٹی اہلکاروں کا مذاق بنانے والوں کو بھی پولیس گرفتار کرنے کے بعد ان کی تصاویر اور دیگر تفصیلات میڈیا کو بھجوا رہی ہے۔ جس کا مقصد ان افراد کو ان کی غیر ذمہ دارانہ حرکت پر شرمسار کرنا ہے۔ اب تک متعدد افراد کی گرفتاری عمل میں آ چکی ہے۔