امریکہ میں بھی وینٹیلیٹرز،ٹیسٹ کٹس اور ماسکس کی قلت ہے

کرونا کا شکار ہونے والے گلوکار سلمان احمد نے سماء کے پروگرام نیوز بیٹ میں گفتگو کرتے ہوئے بتایا کہ انہیں قرنطینہ میں 8 دن ہوچکے ہیں،جب علامات ظاہر ہوئیں تو ڈاکٹر سے رابطہ کیاجس کے بعد انہوں نے اپنے آپ کو قرنطین کرلیا ۔

انہوں نے بتایا جیسے جنگ ہنگامی صورتحال ہوتی ہے وہی صورتحال نیویارک میں ہے، یہاں سڑکیں سنسان اور اسپتالوں میں لاشییں ہی لاشیں ہیں اور تدفین کی جگاہیں بھی نہیں مل رہی ہیں۔

سلمان احمد کا کہنا تھا کہ نیویارک میں وینٹیلیٹرز سمیت کرونا ٹیسٹ کی کٹس اور ماسکس کی قلت کا بھی سامنا ہے جبکہ فرنٹ لائن پر کھڑے ڈاکٹرز اور طبی عملے کیلئے حفاظتی اشیاء بھی مکمل نہیں ہے ۔

گزشتہ ہفتے سلمان احمد نے اپنے ٹوئٹر پیغام میں بتایا تھا کہ  ڈاکٹر کے مطابق وہ کووڈ 19 کا شکار ہیں ۔

اس سے قبل سلمان احمد نے ٹوئٹرپر ویڈیو پیغام میں بتایا کہ وہ پاکستان کے مشہور و معروف فنکاروں کے ساتھ مل کر پاکستان کے نوجوانوں کے لیے ایک حوصلہ افزاء ’تجھے سلام‘ نامی ترانہ بنانے کا ارادہ رکھتے ہیں۔

انہوں نے بتایا کہ وہ ترانے کے حوالے سے پاکستان کے نامور آرٹسٹ نوری، مہوش حیات، ساحر علی بگا، جنید جمشید کے صاحبزادوں سمیت 20 سے 25 فنکاروں سے رابطے میں ہیں۔